Shqipëria ndodhet thuajse në fund të renditjes në Europë sa i përket luftës ndaj pabarazisë ekonomike dhe sociale, sipas”Oxfam”. Vendi ynë renditet në vendin e 76-të në botë, ndër 161 shtete të globit. Sa i përket renditjes së kontinentit, vetëm tre shtete të tjera kanë një renditje më të dobët se Shqipëria, dhe ato janë: Armenia, Serbia dhe Maqedonia e Veriut.
Indeksi i përgjithshëm i angazhimit për uljen e pabarazisë merr në konsideratë tre shtylla kryesore: shërbimet publike, taksat dhe punën. Taksat i referohen regjimit fiskal të një vendi, gjithpërfshirjes së sistemit dhe përjashtimeve apo gabimeve. Puna i referohet drejtësisë dhe barazisë në punë, barazisë gjinore, sindikatave, etj. Shërbimet publike, këtu indeksi merr në konsideratë mënyrën se si qeveri të ndryshme i shpërndarjnë paratë publike, pra nëse merr mbështetje dhe fokus të mjaftueshëm mbrojtja sociale, edukimi dhe aksesi në edukim, shëndetësia dhe aksesi në të nga të gjithë qytetarët, skemat e pensionit, etj.
Në nivel global, në vend të parë është Norvegjia, ndjekur nga Gjermania, Australia, Belgjika dhe Kanadaja. Ndërsa vendet më pak të angazhuara për ta luftuar pabarazinë janë Nigeria, Liberia dhe SudaniJugor.